亞視嘅命運要等到聽日由法庭決定，但係一班亞視嘅舊夥計就趁法官有決定之前，齊齊返到去大埔亞視總台影大合照留念。

今日清晨七點，大班見證住亞視多年嚟高低起跌嘅舊員工包括葉家寶、徐小明、鮑起靜、宮雪花、劉錫賢、蔡國威、黎燕珊、呂晶晶、張嘉瑩、李力持等等等等，差唔多近五十人齊集响亞視門口，趁佢結業前影番張大合照留念。

由於人數眾多，响影相嘅時候大家都要企出馬路，現場又不時有貨車出入，做成少少險象。影完門口相，保安仲肯放大家入去大門口亞視招牌前空地繼續影，認真唔話得。一班舊同事碰面，自然少不了互相問候，有啲响影完大合照後又攞電話出嚟自拍，其中鮑姐仲好有心咁向門口咁多位保安哥哥派利是，雖然天氣依然寒冷仲好大風，但响亞視門口就重現咗久違嘅陣陣歡笑聲同人情味。