Raymond噚日為10月9號、10號兩晚嘅演出,專登約傳媒喺香港公園嘅羅桂祥茶藝館茶敍,貪嗰度夠晒中國feel。Raymond話非常榮幸同香港中樂團合作,事關中樂團嘅造詣同要求都好高,對方肯搵自己合作,證明自己嘅音樂功夫獲肯定,加上佢由細到大都鍾意粵曲,但以往開騷就多數唱歐西流行曲,所以呢次合作都令自己一償心願。
平時要聽楊立門唱歌都係要聽live,佢噚日透露,諗住出番隻Hi Fi碟,主打經典英文歌;以佢把靚聲,Hi Fi碟唔係問題,但正如佢所講,公務員出身嘅佢,離開官場後做商業活動就比較麻煩。除咗出碟,佢寫咗半年嘅小說亦都有眉目,相信過多幾個月就面世,小說一共由幾個短篇故事組成,主題圍繞生死、寬恕呢啲普世價值。
離開官場後嘅生活咁多姿多采,難怪八方同佢提起前上司民政局前局長曾德成,佢都笑而不談。