由河正宇、車太鉉、金荷娜、朱智勛、EXO嘅D.O.主演嘅韓國壓軸勁片《與神同行》將於下周三喺韓國登場。

電影係改編自同名漫畫，講述車太鉉飾演嘅消防員死後被帶到地獄，並要喺49日內喺7個唔同嘅地獄接受審判嘅故事，河正宇同朱智勛都飾演地獄使者，而李政宰將會以閻羅王一角特別演出。今日一眾演員就現身媒體試映會，當中演員都大讚片中CG效果令人好期待，同埋大讚做得好好。男主角河正宇就希望大家欣賞電影時就要同原著漫畫分開來睇，唔會混為一談，亦唔好太集中去執着電影同漫畫有乜唔同。

而現場李政宰被問到如果下一世想做邊個時，佢就搞笑話想做好友鄭雨盛，即時笑爆全場。

另外，由韓國電影製作人協會舉辦嘅「第四屆韓國電影製作人協會頒獎禮」將於下周二舉行，今日大會就公佈各獎項得獎名單，當中李秉憲主演嘅《南漢山城》就獲得最佳電影、最佳剪輯及最佳音響三個獎，最佳導演就由《逆權車伕》嘅李浚益獲得，影帝同影后方面就由《逆權司機》嘅宋康昊封帝，《不能說的故事…》嘅羅文姬則封影后。

而最佳男配角則由《不汗黨：壞傢伙們的世界》嘅金熙元奪得，《The King》嘅金素貞則獲最佳女配角。

其他得獎獎項：
最佳劇本：《不能說的故事…》
最佳攝影：《不汗黨：壞傢伙們的世界》
最佳燈光：《不汗黨：壞傢伙們的世界》
最佳美術：《軍艦島》
最佳音樂：《軍艦島》
最佳技術：《犯罪都市》(武術)
特別獎：《我們》《家》《容順》等獨立電影的製作公司ATO
Kreative Thinking獎：《再審》製作公司OPUS Pictures

更多韓流，喺晒《娛果》
http://fb.com/appledailyent