鄭伊健、陳小春、謝天華、錢嘉樂同林曉峰嘅《歲月友情演唱會一起兄弟篇》上星期六唱到廣州站，呢站係繼紅館之後第一次巡唱開晒四面台，而且5子仲可以好暢快咁講廣東話，所以佢哋表現得特別風騷，更互爆新綽號大放笑彈。

雖然開騷嗰日廣州突然落大雨又塞車，仍冇減歌迷嘅熱情，開騷時全場過萬觀眾揮動螢光棒又大合唱《友情歲月》、《我話事》、《戰無不勝》、《興波作浪》同埋《刀光劍影》等金曲，氣氛相當熱鬧。

之後5子出場同觀眾傾偈互動，林曉峰爆各人都有新花名：「錢嘉樂以前收工就去溝女，o依家收工趕住湊女，各位觀眾『湊女樂』！」又再生多個女嘅嘉樂即刻甜笑話：「哈哈，我一屋女人。」曉峰又爆：「陳小春以前係順風耳，o依家變咗『聾耳陳』。仲有鄭伊健，唔好睇佢咁長頭髮，好快就變『植髮健』。另一個以前好鍾意飲酒，o依家做完騷就搽晒成支藥酒嘅『藥酒華』！」嘉樂都唔執輸爆埋一份：「仲有『缺氧華』呀！」今謝天華要作出反擊：「支藥酒係我哋5個一齊捽㗎！」

至於林曉峰自己呢？佢話：「以前有人叫錯我做林海峰，甚至林峯和謝霆鋒，o依家我年紀大咗就嗌我『胡楓』！」嘉樂聽到仲將「4個小生」擺上枱，指住其他兄弟個：「你係謝賢，你係曾江……」伊健又搞笑問：「咁係咪一齊去旅行先？」小春即刻指住嘉樂話：「你係JoeJunior！」令現場觀眾笑到拍晒手掌。

5子除咗唱歌跳舞互窒之外，還出冧招o氹Fans，天華「Laughing哥」上身chok甫唱歌跳舞、小春踩風火輪跳飄移舞，還有林曉峰赤膊擊鼓騷肌等等，都贏得Fans掌聲同尖叫聲。臨完場前，5子穿上制服出場跑勻四面台唱歌謝幕，全場勁high!

另外，有傳近日有製作公司自稱為開拍《古惑仔》系列電影集資，今日佢哋5子亦澄清沒有接拍。而正式購得內地《古惑仔》版權嘅公司都已經喺網上作出澄清，並保留法律追究權利。