噚日《仁心解碼II》講到陳茵媺喺餐廳接到Client電話，觀眾焦點，除咗係冇解鎖就聽電話呢個常見「神技」之外，令人更加搲頭嘅係，茵媺部手機明明係iPhone，但鈴聲竟然係SonyEricsson，唔通係兩機合體？

先嚟個「鈴聲解碼」，睇慣無綫劇嘅觀眾都知，以前無綫所有劇嘅手機，都係SonyEricsson贊助。基本上任何時段任何劇集，角色係乜嘢階層都好，都不約而同，用呢個牌子手機。由《溏心風暴》嘅嫲嫲李香琴、《珠光寶氣》嘅上流人士同中產，都係用呢個牌子。而任何人嘅ringtone，都係嗰首熟悉嘅音樂。

不過自從HTC董事長王雪紅入股無綫之後，已經冇乜再用呢個牌子手機贊助，而劇入面嘅手機款式，亦越嚟越多姿多采。11年拍嘅《潛行狙擊》，Laughing哥已經開始用HTC ；娥姐商天娥拍嘅《結·分@謊情式》 仲倒轉iPhone嚟用 ，成為「經典」。雖則較新嘅《回到三國》同最近嘅《老表，你好嘢!》都仲見到Sony機，不過可能只係緩衝期，或者係演員用番自己／助手手機都唔定。　

而今次陳茵媺「鈴聲疑惑」（iPhone用Sony鈴聲），可能ringtone係罐頭音樂，後期製作嗰陣一時唔覺意加咗上去，所以先有呢個crossover。亦有網民笑道: 「因為這是iPhone6。用Sony的鈴聲，螢幕上了鎖也能接電話，是iPhone6的新功能。」