近日喺網上爆紅嘅短片，就係一條由一篇潮文拍成嘅短片《公屋●居屋●私樓》，條短片咁成功，除咗因為盧宛茵畫龍點睛嘅演出，同埋潮文本身嘅吸引力，最大功勞就當然係導演啦！

拍攝呢一條短片嘅導演Ronnie同負責收音嘅阿聰表示，佢哋都係從事傳媒工作，所以拍呢條片嘅時候都駕輕就熟，只係用咗一日就完成咗，Ronnie接受訪問嗰時話：「睇咗高登篇潮文好有共鳴，有時諗到結婚擺酒要用錢的話都好灰，所以拍出嚟。原本構思喺搵葉德嫻同蕭芳芳，不過兩個人都半退休，最後透過舊同學搵到Madam盧(盧宛茵)。」

Ronnie表示製作費連Madam盧嘅車馬費，一共用咗5位數字，當中一半費用由一位好朋友資助。至於戲中嘅場地係Ronnie自己位於將軍澳嘅居屋，Ronnie更找來爸爸客串飾演盧宛茵嘅老公。