政府話支持搞創意工業，唔少娛樂事業都以行動證明發展決心，好似有份搞香港電影電視學院嘅來路客BigfootEntertainmentGroup，日前大嗱嗱三億幾銀同資本策略買咗銅鑼灣個商業地盤；另一間外國影片發行商，都用3300萬，買咗葵涌偉倫中心二期一個高層工廈單位，有兩萬五千幾呎咁大，準備喺香港大展拳腳。
利嘉閣測量師行工商部經理蔡鳴楚話，層樓最新成交呎價千三蚊，比起業主○二年五百幾蚊呎買入價，升值接近倍半，仲和味過豪宅，唔多唔少要多得政府拓展影藝事業嘅政策，吸引海外娛樂事業瞓身投資。

講開工廈市場，最近好似冇乜受大市調整影響，持續有大手成交，利嘉閣統計淨係葵涌區今年頭四個月，都有9單過千萬成交，最大宗係大連排道景星工業大廈，買家2月以3870萬買入，呎價八百幾，聽講𠵱家五千萬摸緊，呎價千一。
美記啱啱亦搞掂長沙灣華匯廣場一高層4100幾呎工廈，成交價1085萬，2640元一呎，兩年升值43%。
上個禮拜觀塘三泰工業大廈全幢，四萬一千幾呎，6688萬賣出，呎價1606元，業主舊年7月以3880萬買入，唔夠一年就進賬2808萬元，狂賺七成二，睇怕冇人會估到，買賣工廈原來都可以賺大錢。
電郵地址：[email protected]