【新增照片及內容】
由杜汶澤自導、自演嘅《空手道》入圍第13屆大阪亞洲電影節「競賽單元」部份，早前大會已率先公佈杜汶澤將會獲得電影節大會頒贈嘅「亞洲明星大獎」(Asia Star Award)，去年呢個獎項由影后惠英紅獲得，而阿澤則係首位香港影星以導演身份獲得呢個殊榮。

阿澤已同老婆田蕊妮前日已起程到大阪，連日來佢都有喺網上分享照片，當中佢噚日就去咗支持大阪電影節嘅香港之夜，今日仲喺當地舉行《空手道》嘅簽名會，吸引到唔少影迷捧場。

今日下午香港時間4時左右，阿澤心情靚靚地現身活動及舉行講座，同時獲頒「亞洲明星大獎」。「亞洲明星大獎」係2015年新增嘅獎，旨在表揚喺電影有傑出表現，但仍然勇於挑戰自己、不斷作出新嘗試嘅工作者。

隨後阿澤於Ig公開新相及留言：「今天獲得這個大阪電影節年度亞洲之星大奬，深感榮幸。感謝所有在我演藝生涯中出現過的每一位！今後我定當繼續努力，為建設香港本土電影出一分力！香港電影萬歲！」

而阿澤接受本報訪問時，就指：「今日好開心，我喺大阪拎咗亞洲明星大獎，同一時間知道Stephy（鄧麗欣）喺「最港電影大獎」拎咗最港女演員，對我嚟就更加有意義，呢兩年最艱難時，可以喺香港，甚至香港以外，觀眾同影展認同，我冇失禮香港電影人身份，都係繼續做嘢，無論攞乜嘢獎，聽朝繼續返工呀，繼續為香港電影出一分微力，我雖只不過係電影界small potato小薯仔，喺咁多傑出前輩同業當中出一分力。」

精選娛聞，喺晒《娛果》
http://fb.com/appledailyent