羅君左之前出咗一本寫梅姐嘅書《不可能再遇上Anita-梅艷芳》,今年推出革新版,羅君左特別帶咗本模擬版畀梅姐先過目,佢話:「好似有阿梅幫手咁,本書已經推出第五版,不過個革新版封面版權上有問題,所以要押後兩星期先出。」佢又話革新版會有全新梅姐嘅相,包括從未曝光嘅觀音造型,收益則會改為捐去春蕾行動,幫助四川地震災童。
晚上6點半,歌迷開始化寶同埋品嚐齋宴,蘇小姐話今年歌迷會正籌錢想以梅姐名義喺山區起學校,所以劉德華、張學友、鄭秀文、何韻詩就錄咗個呼籲片段,喺「今夜只因妳08」度播,有近150名fans到場,現場播出梅姐生前片段同MV,有啲fans睇到偶像都忍唔住喊,羅君左就喺台上話仍然有咁多人支持阿梅,相信佢知道都會好安慰同驕傲。