繼噚晚古天樂喺亞洲電影人大獎拎咗影帝之後（新聞連結： http://bit.ly/2FG94aW ），唔夠廿四小時，古仔就再下一城，今晚喺香港電影導演會周年晚宴暨頒獎典禮再憑《殺破狼‧貪狼》拎到最佳男主角，古仔喺台上話：「我以前好鍾意自己嘅世界，所以一直活喺自己嘅世界，慢慢就整咗個自己嘅世界出嚟，呢個就係一個天下嘅世界。」之後佢仲希望在場人士，同佢一齊支持香港電影。

事後古天樂接受訪問，講到佢喺廿四小時內拎咗兩個最佳男主角，佢話：「好開心好興奮，同埋好肚餓，由噚日喺澳門返嚟到o依家都未食過嘢。」剛才紅姐笑古仔少講嘢，古仔解釋：「我不嬲都係咁，慢熱怕生保，不過我內心有團火，希望大家支持香港電影。」

問到古天樂今次再下一城對金像獎會唔會更有信心？古仔話：「唔諗太多，保持心情輕鬆，總之演員就演好套戲，後面嘅嘢交俾上天安排。」問到古仔父母對佢噚晚第一次拎電影相關獎項嘅反應，古仔話兩老問佢拎個獎嚟睇之後講咗句：「個獎好重。」就雙雙返入房瞓，古仔話：「我自己見佢兩個瞓我又跟住瞓，真係好眼瞓，今晚返到去都係即瞓，聽朝一早又要繼續做嘢。」

係咪等埋金像獎先一次過禮祝？古仔笑言：「呢啲唔使等埋先慶祝，今晚見到好多朋友，其實都係一個慶祝，同埋我都收到好多短訊，好多謝大家，我會請大家食飯。」記者笑問會唔會上台唱返首《今期流行》慶祝？古仔：「噓！講啲咁掃興嘅嘢。」記者追問話劉偉強會長想你唱喎？古仔話：「唔好喇，唔好搞到個場面咁冷清，大家食到飽飽地想嘔就唔係咁好啦。」

到咗晚宴嘅尾聲，會長劉偉強叫咗吳君如、楊千嬅、劉美君、任賢齊上台，古仔影緊相，劉偉強話唔好影，落台拖咗古仔上台，之後唱咗《一生中最愛》現場嘉賓起哄，好開心。陳可辛後來都上台。古仔心情明顯大好。

精選娛聞，喺晒《娛果》
http://fb.com/appledailyent