AK家中13歲愛貓畢業赴彩虹橋 長文記錄抗病過程悼念
MIRROR江熚生貓奴
MIRROR成員AK(江𤒹生) 出名是一位暖男貓奴,家中養了多隻貓主子,他曾表示貓貓來自五湖四海,而他在《調教你MIRROR》節目中,亦有提到家中的貓貓,當梁祖堯提議12子可以嘗試一齊生活時,AK卻認真地說因為家中主子年紀大,不想離開牠們。
可是AK昨晚在IG動態中,透露家中13歲愛貓豬仔離世消息,今日再於IG寫下悼念豬仔的長文,他憶述當年媽媽做清潔時,客人家剛生了貓BB,江母就帶了豬仔回家養。可惜兩年前,豬仔被照到腦下有陰影,醫生估計是癌症,更叫AK和家人要做定心理準備,因為病情會在半年內惡化,AK為了醫好豬仔用盡各種方法,可惜豬仔情況逐漸變差。「最差嘅時候,真係只係得返個頭可以郁到,每日要用針筒打營養液,但每日見住你好辛苦,當時都會問自己係咪太自私,只係想你盡量留係自己身邊耐啲,但忽略咗你嘅辛苦,我每晚都會抱住你問你,係咪好攰?個身係咪好痛,如果你唔想撐落去,要話畀我哋知,但你每次都會用你最大力度拖實我隻手指,所以我知道你仲想打呢場仗。」
經過一段日子,豬仔的病情竟然有所改善,AK表示連醫生都說是奇蹟。「事發後半年左右,忽然間你可以慢慢自己行返,食到嘢、跑、跳,雖然無跑得以前咁快,跳得咁高,不過你肥仔底本身都唔係快,所以都ok,你嘅好返醫生都話係奇蹟,最後討論結果可能你係中風而唔係腦癌,不過無論點都好,你都打贏咗呢場仗,我們家最叻嘅小鬥士!」AK表示雖然豬仔病好後,脾氣變臭,經常在家中周圍大小便,自己亦試過很多次中招,雖然AK口中會埋怨,但其實心裏是非常疼錫豬仔。
最後,AK遺憾未有和豬仔及家中其他愛貓一齊影全家福,並感謝豬仔的出現,令家人感到幸福。「我哋會好掛住你,放心喺彩虹橋度跑,去搵波子哥哥同叮叮細佬玩先,嗰度有好多罐罐,我哋遲啲再見,或者希望以另一種方式再續前緣!」
而在昨晚《調教你MIRROR》節目中,性格率直的AK被花姐和梁祖堯私下談論時,花姐一方面大讚AK夠義氣,坦言會珍惜對方的真性情,但同時擔心他的真性情會讓人誤會,梁祖堯說會調教他講真話但不會傷害人。
在節目中,梁祖堯安排外籍健身教練訓練12子,不過AK卻不停拿着健身器材講爛gag和咸濕笑話,揚言:「要冇包袱嘛,我去盡㗎喇!」其他成員見狀起哄齊齊講,令教練感到無奈和尷尬。梁祖堯就此事評AK:「AK講第一下,教練會笑,第二下開始尷尬,再講第三下,教練已經有種……心諗不如我哋返去個class度啦,但AK鍥而不捨講嗰啲咸故,我就開始發現AK佢唔係好留意人哋嘅細微反應,有時佢會俾嗰刻嘅情緒主導咗自己。」梁祖堯指AK擁有此個性和特質,對表演事業有一定幫助,但另一方面,在娛樂圈搵食,隨時會得罪人,更形容AK性格就如一把雙面刃。
AK昨晚在IG透露,家中養了13年的貓貓豬仔離世。(IG圖片)
得知豬仔患上惡疾,AK用盡方法去醫治牠。(IG圖片)
經過半年時間,豬仔病情變好,連醫生都說是奇蹟。(IG圖片)
在昨晚的《調教你MIRROR》節目中,AK稱要卸下偶像包袱,不停講爛gag和講咸濕笑話。(IG圖片)
-----------------------------