正在閱讀這篇文章的陌生人，你好！

「我可唔可以同你傾下偈？」

我正在實行一個計劃－每日迫自己搵一位陌生人傾偈，簡稱「陌樂偈」。

這件事很多人每天也在做，但只是在互聯網上。
而我，是在現實世界，面對面地跟陌生人傾偈。

我在一個公眾場所，鎖定了今天的目標（說得自己像騙徒一樣）－她是一位三十出頭的小姐，獨自坐在一條長樓梯上。

機會來了～陌生人！

我鼓起勇氣，走到她旁邊！

然後，馬上走回頭⋯⋯

雖然傾過了很多次陌樂偈，但依然會猶豫。

像蜜蜂一樣來回了幾次後，我終於坐下來開了口：
「Hello，小姐你好呀～」
她皺起眉頭，呆呆地回應：「嗯？」
她看起來好像聽不懂我的說話，於是我用國語說：
「不好意思，你講國語？」她搖頭。
我馬上轉回廣東話頻道：「廣東話？」
她點了點頭。

「唔好意思呀～我見你好似聽唔到我講嘢，我阻唔阻你？可唔可以同你傾下偈？」
她不耐煩地說：「傾乜嘢呀？」
「我做緊一個計劃，希望同身邊嘅人傾下偈，因為而家啲人個個都成日望著住部電話⋯⋯」

「你係邊個團體㗎？」
「冇㗎，我自己做㗎咋～」
「你會唔會影我相㗎？」
「唔會，亦都唔會問你叫咩名，只係想同你傾下偈，傾完我會用文字寫返呢段經歷出嚟⋯⋯」
「因為我係精神病患者嚟嘅。」
「嗯⋯⋯多謝你話畀我知」

我之前也跟精神病患者傾過陌樂偈，那位在地下鐵的陌生人，我開口前已經知道他有點精神問題，因為他本身獨自在對著空氣指罵，但今次這位陌生人看起來比較平常，開口之前，我沒想過她是精神病患者。

她說：「咁呢⋯⋯就經常都會有啲陌生人，例如佢哋認得我，知道我係病患者，咁行過就會講啲好難聽嘅說話，例如：『呢個傻㗎～』、『呢個癲婆嚟㗎～』、『呢個人xxx 㗎～』，好難聽咁樣囉⋯⋯」
「嗯⋯⋯」我留心地聽著她的說話，感到十分心酸。

不單止是她，我每次在街上遇到疑似精神病患者，也會聽到附近的人在高談闊論，講出以上的說話。其實，精神病患者只是有精神問題，他們不是聾的。

她繼續說：「所以成日都會畀啲我完全唔識佢⋯⋯或者素未謀面嘅人，影響到我嘅情緒⋯⋯我覺得好騷擾⋯⋯我唔明白點解佢哋要咁做⋯⋯我覺得呢啲話我唔正常嘅人⋯⋯本身係咪有少少⋯⋯唔係好正常呢⋯⋯」

「佢哋好不負責任，真係唔明白點解佢哋要做啲咁嘅行為⋯⋯首先，我唔係社工，亦從來都未見過你，只係隨機搵一位陌生人傾偈，希望你唔好誤會我係專登搵你。同埋，真係好難想像你嘅心情，我從來都未喺精神病患者口中，聽過呢啲心聲，好多謝你肯同我講⋯⋯」

「唔使客氣，你係咪會將我嘅說話寫出嚟，俾多啲人睇到？」

「係，一定會。」

「咁我代表所有嘅精神病患者多謝你。」

「我都代表所有嘅陌生人同你講聲對唔住。」

「傻啦，都唔關你事⋯⋯」

然後，我們繼續傾偈，談話過程中，她會突然沉默起來，又會忽然冷笑幾聲。她告訴了我，當年被丈夫拋妻棄子，結果患上了抑鬱症和思覺失調。

「你可唔可以話畀我聽，思覺失調係點樣㗎？」

「第一次嗰陣⋯⋯係聽到有把聲鬧我，好惡嘅，一聽到成個人驚到震晒⋯⋯之後慢慢覺得，見到嘅所有嘢、所有文字、標誌都好似有啲meaning想同自己講咁⋯⋯成日都好覺得好不安、好唔舒服⋯⋯」

只是想像一下，已經令人毛骨悚然，每天也活在恐懼之中，生活一定非常難堪。除了跟她傾偈、聆聽她的說話，我根本沒有什麼可以幫助她。或者，我們只需要尊重他們，當他們正常人一樣看待，就已經是最大的幫助了。

寒冬之下，兩位陌生人在街上傾了半個小時，差不多是時候告別了。
「我走先喇，多謝你同我傾偈。」
「嗯，得閒再傾過。」
「有緣再見，Bye Bye～」

我站起來，跟她互相點頭微笑，然後轉身離去。
我們不知道對方名字，沒有交換電話，就此告別。
我們都是陌路人，就這樣傾了一場「陌樂偈」。

想看更多關於陌生人的故事，可以在Facebook搜尋「陌樂偈」，或繼續留意這個專欄，謝謝你看完整篇文章～



專欄作者簡介：
陌樂偈
每天跟一位不同身分、年齡、職業、性格的人傾偈，
能夠鍛練膽量、增廣見聞、建立自信、提升溝通技巧。
別再被手提電話俘虜，從互聯網回到現實世界吧！

Facebook專頁：
https://www.facebook.com/ChatToStranger/