【BizStarter】一條蹺打動舖王波叔 市價三成平租銀城 搞「KOL格仔舖」
BizStarterinvestMAN反送中銀城
社會運動持續2個多月,零售業影響陸續浮現。設於旺角銀城廣場1樓的「香港跳蚤市場」上周中開幕(8月21日),該場創辦人黃凱貽(Lainey)說:「一定有影響,但我哋包容和體諒,因為我哋香港長大。會唔會選擇錯誤時間?唔會,仲會堅持。」她半年前睇中「舖王」鄧成波旺角樓上「死場」銀城廣場1樓樓面,洽談租賃協議,最終以長租價約3成的短租這個丟空約1年的3,000方呎樓面,租期半年。她說波叔肯短租,要求為商場帶來人流。橋唔怕舊,混合網紅(KOL)與格仔舖,死場變身KOL格仔舖場。KOL在網上推銷完產品總要地方交收,客人又想睇實物,她就將兩者混合,就把客人從線上帶到線下。她坦言,計過盤數有得賺才與2位友人一擲80萬元投資這盤生意。
「我本身做市場推廣工作,諗咗好耐點配合我現有資源,我哋有社交媒體,同好多KOL合作。咁不如搞個跳蚤市場,地方細細,又提供多元化產品,集合好多小資本創業家、店主、KOL,客人可以好似尋寶咁,係度搵到平靚正嘅貨。但係香港做生意最貴就係租金,要搞個大型跳蚤市場係件好困難嘅事。」四圍搵地方,目標是旺角、尖沙嘴核心商業區,「要幾千呎場係唔容易,咁啱見呢度(銀城1樓)前租戶係莎莎,有一年無租啦喎,呢度好似OK,每個人都識。」
鄧成波多年來收集銀城廣場業權,包括早年持有16、20、21及25樓等多層,去年他以7,088萬元先後購入銀城廣場1樓共19個舖位。Lainey膽粗粗向波叔提交計劃書,「同佢嘅deal係,我交底租,獲利後再分成。佢好支持我哋,佢希望我哋幫佢帶旺返呢個場。」她坦言,目前與波叔簽訂半年租約,月租為長租市值租金約3成。據市場消息,前租客莎莎月租逾30萬元。
她的計劃是「KOL格仔舖」,她表示:「好多人話格仔舖無得做㗎啦喎,點解仲要做呢?我係貢獻角度出發,而家香港嘅營商環境好難,點樣可以支持到小資本創業家、手作人。搞市集好焗限,營業時間短,好難畀客人長期睇到啲貨。另外而家興網上商店,但網上商店有一個問題,好多人行街都好鐘意睇實物,睇你件產品係點。格仔舖就提供一個地方畀佢哋,將實物放係度,等有興趣買嘅人可以落嚟睇下。香港舖租貴,咁我哋呢度月租先幾百蚊(每格),又唔使佢放人手,我有人係度。而呢個場邀請咗約100個KOL不停宣傳,每區都有一個KOL代表,呢啲KOL有幾萬到幾十萬嘅粉絲,佢係網上宣傳,帶動粉絲群來我呢度。呢啲KOL有自己品牌、代言品牌或自家製商品,呢啲都可以係個場到賣。另外,有啲KOL唔知賣乜,咁我自己哋有不同合作商戶,有啲商品可以借助KOL營銷。」
場地名為「香港跳蚤市場」涉及面積約3,000方呎,提供1,500個格仔舖,目前出租率約3成,月租約200元至1,000元,遠低於同區市價,例如同區兆萬中心最靚眉位格仔舖月租約2,500元。「叫得跳蚤市場,就想多元化,咩都搵到,暫時比較偏向女性產品,包括護膚品、化妝品、飾品比較多,但我哋期望可以賣玩具、得意、特色等商品,平時跳蚤搵到嘅嘢都可以係呢度搵得到。咩唔可以賣?盜版、違法商品,其他咩都可以賣。」
正直逆權運動時期開幕,她直言:「近期社會運動一定有影響,但我哋包容和體諒,因為我哋香港長大。呢個時候開幕(8月21日)會唔會選擇錯誤時間?唔會,仲會堅持。整個社會負能量太多,就想帶動正能量畀人,你放假玩乜嘢,睇乜嘢,我哋想支持年輕創業者,自強不息,場地照開無悔。當然而家招租,一定有影響,但我哋會做落去,希望盡快租晒啲格仔舖。」她更坦言:「之前計晒數,係會賺錢嘅!」
目前進駐該場的KOL有楊政龍女友黃子菲(Ava),她在場內寄賣嬰兒產品、保健及美容產品,投資約5位數字,「我一直做開Online Shop賣保健、美容產品,賣得好好。係旺角中心、兆萬中心租過格仔舖,反應好好,有啲人鐘意去實體店睇過件貨先至買,暫時每月收入約6位數。但Online Shop有需要租格仔舖,因為就算寄貨畀人,寄去住宅好貴,寄順豐站又要客人專登去拎,咁不如直接過來睇下有咩產品,呢度又有sales介紹產品,又唔使我看舖,呢度人流亦比之前租嘅格仔舖多出幾倍,營業又長啲,咁會賺多啲錢。」
另一網紅是陳蕊蕊,她寄賣美人魚主題產品,「來緊會賣護膚品、防水化妝品,參考其他KOL係網上拍片推銷。格仔舖用好少成本就可以試下創業,而且呢啲場有唔同客源,唔受制於商場主題,例如該場賣化妝品,你一定要賣化妝品。呢度你一半賣呢樣,一半賣嗰樣,呢批唔成功,可以即刻換另一批。(但賺唔到大錢?)由細做起,你無聽到呢個場有KOL每月有6位數收入咩,我都係向呢個目標邁進。(格仔舖式微?)仲有人行喎,仲未叫沒落,始終香港地方細,好多嘢壟斷咗,去大商場淨係買到大牌子,呢啲小牌子越來越少地方會賣。有時我都會去格仔舖睇嘢,因為好多特色嘢,平時大商場見唔到嘅嘢。我信呢個場可以激活,首先格仔舖唔係賣主流產品。通常呢啲所謂死場,一賣啲唔係主流嘅嘢人會旺。主流商場一定要賣主流產品,非主流商場賣非主流產品,一定有佢嘅價值,咁多年香港唔知點解都有呢種現象出現。」
影片
採訪:陳家雄
編撰、旁白:張嘉鎣
攝影:細釗
剪接、後期:Boy
編審:倪敏慧
investMAN
For People of Style & Substance
掌握理財智慧 感受生活品味
http://facebook.com/investMAN.hk