當年今日
關於我們

【哈軍衝超】穩袋17億唔做暴發戶 二千蚊主場季票有良心

蘋果日報 2017/05/30 06:21

英超英冠雷丁哈特斯菲爾德溫布萊升班附加賽英國足球

【新增動新聞】
基斯杜化舒捷拿嘅12碼,可能係最價值連城嘅極刑?周一英冠升班附加賽決賽,哈特斯菲爾德憑呢位德國守將喺互射12碼最後一輪操刀命中,以4:3擊敗雷丁,取得最後一個2017/18英超席位。有統計指,哈軍同白禮頓兩支英超新鮮人喺未來三季透過電視轉播分紅同「降落傘津貼」(Parachute Payment),最少穩袋1.7億鎊(約17億港元),如果來季唔使做「升降機」,收益更會激增至2.9億鎊!
不過,唔好以為哈特斯菲爾德有17億袋袋平安就搖身一變成為暴發戶,按照佢哋早喺3月公佈嘅17,000張來季季票定價,成人季票只售199英鎊(約1,990港元),連續9季或以上季票持有者更享有半價優惠,即係一張「金牛」就可以睇足全季主場英超;相比曼聯季票最少要532英鎊(約5,320港元),出晒名貴價嘅阿仙奴季票就更加唔在講,日前有「槍手」fans表示自己收到電郵通知,因為球隊失落來屆歐聯資格而有折扣,但龍門後面低層座位全季都要846鎊(約8,460港元),過去一季未減價前更要上千鎊,哈軍絕對係英超「良心」!