韓國男星李光洙同男團EXO成員D.O.上年因合作劇集《沒關係，這是愛情》而成為好友，上個月仲被發現孖埋趙寅成去日本東京旅行過中秋節。做得好兄弟唔多唔少都有啲緣份，今朝二人就同時經由仁川機場出發，飛去內地開工，光洙去重慶出席代言活動，D.O.就去廣州舉行組合演唱會。

咁上下時間現身，雖然機場都大，但都畀佢哋兩個偶遇到，仲傾咗兩句，搞到送機嘅粉絲都話一次過見齊呢兩粒星真係千載難逢。而光洙仲十足大細路，被影到排隊等候辦理登機手續時坐住個篋，唔通佢等到腳仔攰？

到抵重慶之後，光洙就即刻換衫去到活動場地，吸引近300名粉絲到場圍觀，而光洙落車時見到門口有咁多粉絲等佢都嚇一跳，不過可能知道自己人氣高，所以都忍唔住偷笑。

雖然個停車位同活動入口距離唔係好遠，因為兩旁有太多粉絲伸出「鬼手」想接觸光洙，光洙又好好人咁同粉絲握手，搞到行咗一段時間先入到場。