余慕蓮仍在QE留醫親自報平安 繼續飲營養奶未落得床
蘋果日報 2021/03/08 20:38
余慕蓮肺纖維化
現年83歲資深藝人余慕蓮（魚毛）去年11月因肺纖維化入院，曾一度危殆入ICU，幸最終大步檻過，留院3個多月後轉到九龍醫院接受治療，惟上月有傳魚毛情況轉差，需入住伊利沙伯醫院（QE），好友林建明指是魚毛自己要求。
今日魚毛接受《蘋果》電話訪問親自報平安，她指目前仍在QE留醫：「都喺醫院，成日瞓喺度，籮柚痛。」問到是否仍未落得床，醫生怎說？魚毛表示：「好少見到醫生，成日話等好啲轉去九龍醫院，因為九龍醫院有物理治療，遲啲啦，醫生批准咪得囉。」至於當日為何要求轉去QE？魚毛說：「我諗住伊利沙伯醫生多嘛。」
問到目前情況有否好些？魚毛說：「都係咁囉，成日瞓覺，瞓到籮柚痛背脊損。」現在有否胃口進食？她說：「食唔到嘢，要飲營養奶，飲咗幾個月啦，唔講啦，我冇乜氣，我唔夠中氣，拜拜啦。」
-----------------------------
《蘋果》英文版免費試睇：了解更多
-----------------------------
支持蘋果深度報道，深入社區，踢爆權貴，即Like蘋果專題及調查組FB專頁！