水晶宮由開季到依家都喺聯賽榜下游掙扎，入波唔多自然係球隊嘅毛病之一，前鋒賓迪基上周末嘅聯賽爭射12碼但係炒咗，搞到球隊只係同般尼茅夫打和2:2。事後已經有報道，賓迪基根本就唔係球隊嘅劊子手，當時專責幫水晶宮射12碼嘅米利禾積域仍然喺場上，自然令到鶴臣更加嬲嬲豬。

水晶宮嚟緊禮拜六會作客李斯特城，鶴臣喺賽前就公開批評賓迪基，話佢作為球隊嘅前鋒但係無士哥，實在係令人擔心：「無論對佢自己、對球隊定係球迷，呢個都係一個問題，佢除咗繼續搏命之外，都無乜嘢可以做。如果仲係無波入，佢至少都要為球隊帶嚟其他貢獻，無論進攻抑或防守都好，咁樣落去我哋頂唔順㗎喇，一個無波入嘅射手喎！」

賓迪基喺2016年8月以3,000萬鎊由利物浦加盟水晶宮，佢自從今年5月之後已經未曾入過波，亦即係話今季無論係幫水晶宮、抑或比利時上陣都好，都係食白果㗎！

--------------------
球迷一定要知！英超一哥曼城，已經登陸『BFB』！登入即送藍月球星： http://bit.ly/2AAiPDS