超大現代（682）掌舵人郭浩舊年底，喺傳媒面前講過毋須融資，都足夠還清今明兩年近29億元短債，點知一個屈尾十，事隔兩個月，超大就喺市場配股，吸水近4億港紙。原來呢單嘢有段古，郭總話係為咗畀面人，「被迫」配股收錢。邊個咁大面子？咪係「民企之父」張化橋囉！
性格豪邁嘅郭總，噚日喺業績會為自己前言不對後語大平反，重申冇咗配股嗰筆錢都冇問題，仲話唔通有人送錢畀我使都唔要咩？

股價過10蚊再諗配股

郭總越講越有火，自爆配股來龍去脈，全因回巢瑞銀近半年嘅張化橋，喺香港上門搵咗佢幾次，話好認同超大經營模式，希望分得1億美金貨仔，但郭總眼見超大冇需要而拒絕咗。之不過，張化橋並無放棄，郭總話張化橋仲「夾着尾巴」專程飛到北京想說服佢，為咗畀面，郭總惟有應承頂多配股5000萬美金，多一蚊都唔制。
佢補多句，話呢幾日張化橋仲想追加1億美金貨，但自覺家超大股價基本上太低，所以一直都唔答覆，「拒絕佢，佢會很傷心；答應佢，對公司又唔負責任。」郭總仲話，如果有吹水成份，可以拉佢坐監，或者請華華食飯喎！
一句到尾，超大仲會唔會配股先？郭總答案係起碼等股價上番10蚊、12蚊（去年高位），都可以考慮吓！超大噚日收報4.5元，咁即係……下回再分解啦！

李華華
mailto:[email protected]