陳美齡今年書展推出新作《我們都是地球人 被遺忘的孩子》，今日親身到書展舉行分享會，本身係聯合國兒童基金大使嘅陳美齡，之前就隨團去歐洲、非洲等地，探訪一啲好需要救援嘅小朋友。陳美齡話自己去過13個國家，好多地方嘅印象都令佢好深刻，佢話：「睇到啲小朋友為咗生活而要賣身做妓女，細到11歲、3歲都有，講出嚟都冇人相信，每年探訪呢啲小朋友，返嚟就會報告，希望做出適當嘅救援。」

陳美齡仲提到，亦曾到訪有好多打仗嘅地方，當地嘅小朋友就最慘，佢哋日日都好似要走難咁。問到要到打仗地方，家人可會擔心？佢話：「我要說服佢哋，我先生就話會陪我去，幫我擋子彈囉！我啲仔就都陪我去。(有冇遇過好驚險嘅事？)有一次去蘇丹，坐住聯合國嘅車，可能風沙太大，啲人向佢哋開槍掃射，好彩架車係防彈，當時先生唔係同我同車，好彩大家都冇事，冇受傷，希望將呢啲事話俾大家知，呢個世界有呢班小朋友嘅存在囉！亦有街童，得15歲，因為生活而出賣自己，仲要打胎兩次，見到佢嘅時候，佢就同我講最想要擦紙膠，希望擦走自己嘅過去，忘記以前嘅事。好多過案諗番都好想喊。」

精選娛聞，喺晒《娛果》
http://fb.com/appledailyent