保羅普巴同法國踢完兩場世盃外，依家已經歸隊為曼聯備戰周六作客史篤城嘅英超賽事。對普巴嚟講，備戰工作梗係唔只練好波咁簡單，個賣相都好緊要，今次又玩變髮。普巴日前走去染頭髮，再染多啲紅色，隨即將片放上自己instagram，公諸同好。

睇怕普巴都係NBA迷，見佢去度假周時都會打下籃球，又鍾意著NBA球衣。佢喺片中著住火箭波衫，同佢個紅髮新look都幾襯。曼聯喺今季英超頭威頭勢，係目前唯一一支3戰全勝嘅球隊，一共入10球冇失球，當中普巴表現都好搶鏡，貢獻咗兩球。佢喺季初把頭髮，本身已經有少少紅色，今次實行搞大佢再染多啲紅色，希望繼續「紅」運當頭。不過普巴佢十日八日就染一次頭髮都真係幾傷，小心染得多搞到脫髮，好似前隊友朗尼要搵織髮公司幫手就唔好啦。