中國國家足球隊聽日就會喺陝西省體育中心，出戰世盃外亞洲區12強賽，主場迎戰敍利亞。國足頭兩場贏唔到，但表現唔錯，今場面對同組入面實力較弱嘅敍利亞，有機會開齋啦，所以球迷都好想入去捧場。

據內地傳媒話，喺啲二手飛網最平嘅180蚊人仔門票，炒到去1,200蚊；而1,280蚊嘅貴飛亦普遍炒到上2,400蚊，最貴交易紀錄係9,000蚊兩張，兌番成5,200蚊港紙一張。有內地記者日前去到球場外，發現好多黃牛收飛，仲願意用1,200蚊去收一張580蚊嘅飛㖭。咁其實，呢場外界睇好國足都好正常，因為敍利亞太窮嘞，賽前配套做得好差，唔單止冇包機，球員仲要坐最平嘅航班，轉幾次機去西安，真係轉機都轉到暈，而且教練夏堅嘅月薪仲只得2,000蚊港紙多啲㖭。
另外，國足賽前發佈呢場嘅海報（下圖），寫明「要贏」，而個「要」就有心思地用「西安」組合而成。