利物浦上個禮拜六雖然千辛萬苦作客以3:2險勝李斯特城，但係球隊防線不濟嘅毛病仍然存在，就連領隊高路普都話咁嘅情況真係好難頂！

利記今季踢六場聯賽失咗11球，只有榜尾嘅水晶宮、韋斯咸同李斯特城嘅失波比紅軍更加多。對於球隊嘅情況，高路普亦都承認：「好明顯我哋嘅失波真係太多，呢個係毫無疑問嘅，咁真係好難頂！通常我係一個防守做得幾好嘅教練，但明顯依家情況唔係咁。」

球隊防守雖然唔理想，不過高路普就繼續撐自己嘅球員：「我仍然有信心，唔止係進攻上，而係成隊波。我知道球隊要攞到好成績，或者無乜人鍾意呢隊波，但我真心鍾意呢隊波、呢個陣容，我希望可以令到佢哋每一個都可以進步。」