西班牙法庭近期向唔少海外球星同教練出手，控告佢哋逃稅，之前巴塞隆拿前鋒美斯已經被判刑21個月，最近就有皇馬前鋒基斯坦奴朗拿度（C朗）同前皇馬教練摩連奴又涉嫌逃稅，不過球迷又唔使擔心球星真係要坐監，好似美斯咁，法庭已經接納佢以罰款代替刑期。

據西班牙世界報報導，西班牙法庭已經接納美斯及佢爸爸嘅罰款代替刑期要求，根據西班牙法庭條例，如果判刑不多於24個月，可以以400歐元（約3500港元）換取一日刑期，美斯21個月就畀多約25萬歐元（約218萬港元），佢老豆就要找18萬歐元（約160萬港元）。連埋逃稅案兩人已經被罰350萬歐元（約3050萬港元），係就係有啲肉赤，不過學鵬哥話齋，錢解決到嘅問題，就唔係問題啦。所以C朗、摩連奴都要留定筆錢找數好過啦。