公投五俠遞咗辭職信，今晚會舉行第一場公投造勢大會，夜晚8點鐘喺中環遮打花園開鑼，八方睇過節目程序，發現大部份時間都係唱歌環節。雖然公民黨、社民連強調今晚係五區公投起動大會，不過特區政府卻當正係起義大會，八方收到風，警方日前主動聯絡晚會搞手，名為討論維持秩序安排，實際卻想收風，打聽造勢大會結束後，集會人士有甚麼「餘興」活動，例如會唔會殺上禮賓府或者夜襲中聯辦。
反高鐵人士摸黑衝上禮賓府，圍堵煲呔官邸，令政府高層震驚，難怪今次要預早攞料早作部署，可惜搞手話今晚遮打集會10點鐘結束，集會市民之後去邊度，主辦單位完全控制唔到，因此冇辦法警民合作。
香港人去聽演唱會，encore已經係指定動作，否則就覺得唔抵，分分鐘要求回水，今晚大會預計10點鐘結束，呢個時間好尷尬，返歸瞓覺尚早，食晚飯嫌晏，消夜又未夠鐘，80後都係夜鬼，應該好多人意猶未盡想encore，至於佢哋有乜搞作，八方真係無從估計，估佢唔到先係80後吖嘛！

隨時即興BBQ

網上有人玩嘢，聲稱要向特首辦申請到禮賓府BBQ，今晚話唔定有人想即興燒嘢食，或者去觀賞煲呔啲錦鯉，操上禮賓府要求開門，為咗煲呔有覺好瞓，八方相信警方必定會在中環屯駐重兵，有乜風吹草動，大家食正胡椒噴霧嘅機會應高過食燒雞翼。
今晚造勢大會公民黨黨魁余若薇同民主黨創黨主席李柱銘會站台發言，五個辭職議員輪流發言兼唱歌，包括《國際歌》、《海闊天空》、《光輝歲月》、《人民之歌》、《PowertothePeople》，基督徒學生運動將《愛是不保留》填上新詞變成《議席不保留》，「無良暴政雖是仍壓在前頭，社會公正萬眾一心堅守，你我共鳴區區快樂公投，投下普選一票信心夠。」有人建議當做公投主題曲，想學唱可到YouTube睇 http://www.youtube.com/watch?v=orB0427l8y0
mailto:[email protected]