回歸10周年政府大搞慶祝活動，自言反對派旗幟鮮明嘅社民連都有嘢搞，不過唔係慶祝係贈興，情商政治漫畫家馬龍設計咗件「回龜T恤」（圖），諗住賣畀fans籌募經費，可惜唔係幾賣得，囤積咗批貨喺度，都幾頭痕。
社民連陶君行話，T恤滯銷同馬龍個公仔無關，「個漫畫好有意思，弊在件衫質地太差，賣畀人都唔好意思。」據講批衫係喺大陸做，將貨就價「質地衰過底衫」，為免被fans柴台話佢哋賣次貨，決定hold住先，𠵱家再諗辦法整過第二批「見得人」嘅回龜Tee。