「女長毛」雷玉蓮一踏入猴年，人緣運爆升，連續兩日巧遇名人！蓮姐噚日去禮賓府遊行，為梁振英「開年」後，就向八方透露，年初二去大嶼山寶林禪寺搵師傅拜年期間，巧遇資深女藝員陳秀雯前夫、出家多年的亞視前藝員林國雄！蓮姐話，藝名「叉燒」的林國雄，近年極少曝光，現時法號叫「衍雄法師」，主要喺內地修行，一年只返港一次，估唔到咁都撞到。

警員不知廟內有領事

蓮姐昨午兩點幾去車公廟，又撞見美國駐港總領事夏千福，仲成功蹺住千福BB隻手合照！蓮姐話一眼就認出千福BB，話問過駐守廟內的警員，知唔知道有領事到咗場，警員都懵然不知。
蓮姐見千福BB喺廟內好專心聽職員講解，仲自掏腰包買咗風車應節。蓮姐上前問千福BB係咪嚟拜車公，千福BB答「係」，當蓮姐要求合照時，千福BB亦即場答應，臨走仲同蓮姐講句「恭喜發財」，令蓮姐覺得千福BB真係一個平民領事，唔似梁振英咁乞人憎喎。
千福BB喺fb透露，原來噚日仲去咗粉嶺蓬瀛仙館認識「攝太歲」習俗，又讚齋菜好味，睇嚟猴年佢真係過得好開心喎。

李八方
mailto:[email protected]