禮拜六《蘋果日報》又搞講座，敏妮當然唔執輸。今次已經係《蘋果》第四次搞講座，敏妮四次都有捧場，發覺今次參加者問嘅問題，同以往三次好唔同。之前三次，最多聽到嘅係問冧巴，某隻股買唔買得過？幾多錢買？幾時放？至於今次，散戶好少問某隻股某個冧巴，反而問個市見頂未？家吓應該買邊啲行業？
散戶關心嘅問題有變，正好反映咗市況今時唔同往日，之前三次，港股雖然都好旺，散戶都有斬獲，但相對今次，個市可以話真係有啲癲，散戶隨手買一隻都可以賺到錢，基本上一街都係股神，唔使問買邊隻股票好，不過，連公認香港股神嘅李兆基都叫大家審慎，所以散戶關心嘅係好景仲有幾耐，有邊類股𠵱家上車都仲有排炒。

見到呢個情況，反而令敏妮更擔心後市，點解？成日聽啲前輩講，當個市仲有人驚跌，即係個市仲未會跌。當大家以為個市會喺幾多點就見頂嘅時候，一般都唔會見到，只有當大家都以為大步檻過、鬆懈咗嘅時候，股災就會出其不意來臨。睇番講座啲參加者，佢哋雖然關心市況會唔會見頂，但並唔表示佢哋驚，反而係，佢哋認為股市暫時仲未會見頂到，所以繼續搵股炒。
四叔之前講，恒指會見三萬；市場又成日有人話，08奧運之前，大陸政府唔會畀個股市冧。試問當大家都知三萬點時個市會冧，你會唔會等到三萬點先嚟沽貨呢？又你估會唔會08奧運聖火一熄，大陸政府就停止撐個市，股市應聲下跌呢？當股神畢菲特都沽貨，四叔又打晒開口牌話會沽貨嘅時候，敏妮自問唔會叻得過股神，所以都係死跟。手痕嘅，就將之前贏嘅部份「彩金」小注怡情算喇！
http://manlitalk.com/blogs/