今年聖誕港人特別興奮，經濟好轉令人心暢快，好多人都攞假外出旅行，輕鬆一吓，至於班高官，由於政府實施五日上班，佢哋今日開始已經提前放聖誕假。
其中財政司司長唐唐更加係快人一步，噚日已經開始休假，直到29號返工，其間同老婆仔女一家人去日本滑雪，大享天倫之樂，話之你香港政界存暗湧，一於放假大過天。
查實佢年底返嚟之後，有幾單大嘢等住佢處理，例如明年2月28日公布嘅財政預算案；預計明年首季出場嘅大嶼山發展藍圖；扶貧委員會計劃明年中發表嘅報告等，都係大projects。不過曾經滄海，咁濕滯嘅銷售稅都試過，其他嘢都應該冇乜難度，只係唔好好似銷售稅咁爛尾就好喇！
下屬有假放，煲呔亦唔差，佢喺香港度幾日開心假期後，到26號拆禮物日先上京述職，其間由肥龍留守香港，過吓署理特首癮。06年好快過去，睇嚟多一事不如少一事，有嘢，留番07年先講！