當年今日
關於我們

求驗客手記:形勢告急!請支持港隊 - 求驗客

蘋果日報 2007/11/19 00:00


香港隊喺世界盃預賽作客慘吞土庫曼3蛋,又再提早出局。講真,以港隊目前嘅實力,主場都贏唔到,作客舟車勞頓,球迷更加唔會寄厚望。
網友狂插準備差
估唔到嘅喺,南華足主羅傑承喺幾個月前嘅足總大選,高調力撐梁孔德做主席,賽前同賽後竟然掉轉槍頭,連續兩日喺「南華部落」狂數新任足總領導層,話佢哋賽期編排混亂;仲話如果佢做足總高層,寧願派𡃁仔出賽吸取經驗噃。
世界盃4年一度,就算出線機會唔大,我求大俠覺得足總點都有責任早啲備戰;點知足總新領導層淨係識賽前加吓獎金,草草操幾課。𠵱家輸3球出局咁難睇,難怪球迷谷氣。
唔少網友就喺討論區,狂插呢支港隊陣容弱雞,準備工作更加係近年最差。教練黎祥賽後話,港隊其實表現算唔錯,起碼做到有攻有守,衰在自己交失波造就土庫曼先入波;而下半場利偉倫後場嚴重失誤令球隊再失,先至跌落絕境。
其實,港隊有問題,咪即係香港足球有問題。過去十幾年,本地球隊重用冇質素嘅外援同國援,令一班有質素嘅小將冇機會出場;咁嘅環境,想港隊有成績都幾難,最後搞到黎祥喺預賽前要搵蔣世豪出山,就知本地球員幾咁凋零。
假如好似羅生咁講,搵班𡃁仔去踢,輸10球8球返嚟,又由邊個負責呢!計我求大俠話,既然大家坐埋一條船,不如齊齊諗計做好啲青訓,搞好本地足運好過啦!
empty