杜如風同胡慧沖兩位旅遊達人，今日齊齊現身尖沙嘴出席頒獎活動，杜如風早前不停飛來飛去工作，近排終於有時間休息，佢笑笑口話：「我o依家過半退休生活，呢排做番多啲運動，好似跳舞、滑水，我平時好少時間做運動。」聖誕節係旅遊旺季，杜如風表明唔會捱貴機票外遊，所以每年聖誕都留喺香港，其實仲有另一個原因，好友何超儀係喺12月26日生日，所以一班朋友都會聚集開派對，當然會互相交換整蠱嘅聖誕禮物，佢話：「我試過買200蚊嘅卷裝廁紙，200蚊嘅即食麵，收到嘅人驚喜之餘又好實用。」

獲得唔少旅遊獎嘅胡慧沖，早前玩票性質灌錄新歌《快樂泰度》，點知竟然收到消息入圍今個月29日舉行嘅新城勁爆頒獎禮2018爭「勁爆新人獎」，佢話提名已經當係得獎：「我睇冇乜機會頒畀我，我都一把年紀，留畀啲真正唱歌後生仔女。」他坦言不在其位，都係專心拍旅遊節目，唔會再出新歌，今次純粹令大家聽得開心。

精選娛聞，喺晒《娛果》
http://fb.com/appledailyent