講起新民黨葉劉淑儀，唔少人可能諗起佢嗰條經常不吝嗇展露嘅「白滑幼腿」，葉朗程似乎都好關注。當佢得悉財經專欄作家渾水會喺港台節目《視點31》與葉劉同場，即刻喺Facebook留言，話渾水如果可以喺鏡頭前對葉劉講句：「我覺得你對腳真係好靚」，就會捐1萬蚊畀渾水指定嘅慈善基金或傳媒機構，仲話生於50年嘅葉劉屬虎、91年出世嘅渾水屬羊，今次仲唔係，送羊入虎口？

結果⋯⋯渾水真係做到嘞，噚日播出嘅節目中，同葉劉講「我覺得你對腳真係好靚」，雖然講得唔夠自然，但總算講得出聲。葉劉都好受落喎，節目播出後喺Facebook發帖，指多謝渾水送佢一紮小花，仲叫承諾捐款者，一定要遵守諾言。葉劉點解咁happy，因為佢好多fans都因此留言讚佢條腿好靚，甚至有人問佢條裙邊度買到幾多錢⋯⋯葉劉親自回回覆係大減價時喺IFC Bora Aksu買嘅。

或者驚有人誤以為自己重口味，渾水其後都有喺Facebook貼出葉劉嘅po留言：「葉太，和你激戰，我很快樂」，當然最後一句最重要：「葉朗程，請你馬上捐錢」。之後意猶未盡再發帖，指「有時了解吓另一個社群都會發現一啲有趣嘅驚喜，大佬你自己垂涎三尺就唔好屈我啦⋯⋯」

同葉劉激戰上埋google trend喎，八方今朝都問過渾水「戰後感」，佢話一切構思都係嚟自葉朗程，「如果做到一個效果，有人捐錢，何樂而不為？」葉劉今日則繼續着裙露腿去立法會開會。乜葉劉唔驚凍親條腿咩？佢就話近排天氣唔算凍吖，所以就算着裙，都唔會好凍，佢仲自信滿滿同八方講：「我唔算高，不過都唔肥」，似乎自豪保養得宜喎！

葉朗程今日下晝兩點幾喺Facebook宣佈，已就佢要求渾水「眾目睽睽下情挑七旬熟女」一事「找數」，話如果渾水公然戀腳值一萬，「那麼葉太公然曬腿，又何嘗不值一萬呢？」，加上佢想攞個意頭，所以就決定捐20,339元，畀渾水選擇嘅受惠機構「精神健康基金會」，話20,339呢個數字，「寓意愛你生生夠，祝兩位輪迴一百次也可以浪漫下去」喎⋯⋯

-----------------------------

《蘋果》英文版免費試睇：了解更多

英文版已登錄《蘋果》App，立即下載/ 更新：iOS / Android

-----------------------------

支持蘋果深度報道，深入社區，踢爆權貴，即Like蘋果專題及調查組FB專頁！