第28屆金曲獎頒獎典禮噚晚喺台灣舉行。台灣天團五月天，本身今年有8項提名成為大贏家熱門。點知最後僅得阿信拎咗個「最佳作詞人」同「最佳國語專輯」兩個安慰獎，唔止fans失望，就連主音阿信喺台上都難掩失落之情。

至於擊敗五月天，奪得最佳樂團獎嘅，竟然係頒獎禮初哥「草東沒有派對」，據今日出版嘅台灣《自由時報》報道，「草東沒有派對」喺20張評審票中，更以超高票數19票壓倒性擊敗五月天，而「草東沒有派對」喺噚晚頒獎禮中，除咗擸埋新人獎外，更憑歌曲「大風吹」，擊敗周杰倫嘅「告白氣球」、五月天嘅「頑固」同楊丞琳嘅「年輪說」，奪得金曲獎年度歌曲大獎，絕對係噚晚金曲獎嘅大贏家。

講番呢隊「草東沒有派對」，成員有4個（林耕佑、詹爲筑、楊世暄、劉立），最早開始時嘅團名為「草東街派對」，由幾位玩團又鍾意去草東街嘅年輕人組成。團名「草東街」，就係位於台北陽明山嘅街道名。

2012年，「草東」已經成為一支受當地受注目嘅樂隊，小型演出更係一票難求，舊年推出首張專輯《醜奴兒》，更賣斷市。一支地下草根樂隊，竟然撼贏周董同五月天等台灣樂壇天王，實力確係不容忽視。