【似三姊妹】文雪兒自揭患乳癌 兩個索囡囡學媽咪踩入娛圈
乳癌文雪兒袁萃張筠
現年60歲的前佳視和亞視花旦文雪兒(本名張惠英),跟前夫生下大女Christy和細女Jennifer後離婚,至2005年再嫁任職建築師丈夫袁慧明,一家四口生活美滿,文雪兒除發展連鎖美甲生意外,近年亦簽約無綫拍劇。在今日一篇周刊專訪中,文雪兒與27歲大女Christy一起受訪,原來現職土木工程師的Christy,近日因為IG靚相而獲洗米華舊愛Mandy Lieu的模特兒公司QUEST睇中,覺得她貌似韓劇《夫妻的世界》中「最靚第三者」韓素希,所以簽為旗下藝人。
訪問中,文雪兒自揭當年離婚後為照顧兩女,於是創業做美甲生意,最高峰時曾打理16間店,結果挨出大病,在大女12歲時自己患上乳癌,幸好是初期,不用將乳房切除,但為不想兩女擔心,文雪兒在臨做手術前一晚才告訴囡囡。《蘋果》曾聯絡文雪兒,欲了解當年患乳癌經及囡囡入行,但文雪兒表示不便受訪。
現年27歲的Christy張筠(隨母親姓),與23歲妹妹Jennifer(袁萃)遺傳了母親靚靚基因,原來除大女外,細女亦已簽約Mandy Lieu公司旗下,三母女將來隨時有機會一齊合作演出,連埋文雪兒三家姐元秋(張轉男),可謂一門四傑。
《蘋果》今日聯絡Christy,問媽咪是否支持入行時,Christy說:「我媽咪其實好支持,由細到大都係如果我開心佢就OK。」希望在演戲還是模特兒工作發展?Christy說:「我成件事都好突然嘅,係媽咪生日個報道出咗,跟住畀QUEST sign咗,我暫時未諗到咁遠,我覺得如果由modeling開始做起,會更適合我多啲,學習多啲見鏡頭,之後慢慢再諗下一步。」有沒有看過媽咪年輕時演出?Christy說:「有呀,《甜甜廿四味》同埋《對對糊》囉,比較青春嘅偶像劇都幾鍾意。」
Christy拿獎學金完成英國UCL土木工程碩士課程,現職是工程師,記者指她轉行做藝人似乎有點「嘥料」,畢竟娛樂事業未必能一步登天,Christy說:「都係㗎,所以我想考咗個牌先,起碼我有個保障,達到個milestone(里程碑),我讀完之後,而家做咗嘢4年,咁就可以考專業資格,我諗住今年9月考埋佢,所以暫時都係part time形式去做。」雖然Christy公司老闆是Mandy Lieu,但她表示從未接觸:「其實我未見過佢㗎,我見過另一個老闆囉。其實我妹妹都同我一齊簽咗畀QUEST,公司都係睇咗媽咪生日啲相,一齊簽咗我同妹妹嘅。」
說到媽咪15年前患乳癌一事,Christy表示:「人哋話過咗7年冇再翻發就冇事,而家都過咗10幾年,媽咪都好健康,不過我都不時提醒住媽咪要keep住做body check㗎。」
-----------------------------
文雪兒與前夫生下大女Christy和細女Jennifer。(IG圖片)
文雪兒今年3月跟大女Christy(左)和細女Jennifer(右)慶祝60歲生日,文雪兒保養得宜,三母女尤如三姊妹。(IG圖片)
文雪兒2005年跟現任丈夫建築師袁慧明結婚,一家四口生活美滿。(IG圖片)
文雪兒大女Christy在IG不時展示美好身段,因而被模特兒公司睇中邀入行。(IG圖片)
23歲細女Jennifer亦遺傳了媽咪靚靚基因。(IG圖片)
文雪兒1979年與張國榮拍攝麗的《浣花洗劍錄》成經典。(網上圖片)
Mandy Lieu公司近日簽了文雪兒兩女為旗下藝人。(資料圖片)