郭富城日前喺微博「放閃」晒同女友方媛手拖手照公開戀情，唔少人都抽水跟風，今日甄詠珊有樣學樣，喺微博放咗張同男友拖手相，留言：「謝謝四年來你對我的好......」朋友仲以為佢地好事近，但據悉甄詠珊實情喺同有個仔、圈外經商男友分咗手，傷心過度一時感觸。其實甄詠珊為呢段情犧牲好大，當年甘為男友「折彈」，將僭建嘅32D上圍變回31B微乳。

另外，噚日甄詠珊孖住師弟安俊豪出席活動，在場記者問佢會唔會織頸巾送畀男友？甄詠珊露咗少少口風話﹕「會織頸巾，但0依家工作先係我男友。呢個月我都好full，或者由安俊豪做我partime男友先啦！」

安俊豪話願意做佢最大粒「兵」，而兩人年齡相距9年，問甄詠珊介唔介意姊弟戀？佢話：「佢(安俊豪)細我太多。但如果郭富城就真係唔介意，兩個都係俊男美女組合，我都唔覺得佢似呢個年紀。」

今日《蘋果》致電甄詠珊，佢亦坦白承認分手，佢話：「係，好新鮮滾熱辣，呢一、兩日嘅事。唔算突然，因為大家步伐唔一致，大家係和平分手，並唔涉及第三者。」係咪好可惜？佢話﹕「緣份上天安排，暫時呢刻去到呢個位，我希望做到一個新時代嘅獨立女性。」