名模周汶錡（Kathy）一向緋聞多，最近她就被影到和台灣型男、有「乳頭男」之稱的高以翔拍拖夜會，當街搭膊錫錫，更傳Kathy為高以翔和法籍男友分手。Kathy昨日例牌否認緋聞，表示與男友仍未分手，但言談間難掩對高以翔的好感，大讚對方又高又nice，要着高跟鞋、搭住膊才高攀得起！

周汶錡和法籍男友拍拖多年，她卻屢和台灣男子傳緋聞，曾和連勝文傳過緋聞的她，近日又被影到和台灣型男高以翔約會，兩人在香港夜會吃飯，Kathy搭膊傾密偈，兩人又當街錫面親親，旁若無人，更有指Kathy已與法籍男友分手。

否認飛男友

Kathy昨日在屯門出席匡智會活動，對於與高以翔的緋聞，她初時不肯回應，擾攘一輪後才走出場外受訪，她說：「都有睇報道，不過，係冇乜影到，所以都冇乜好講。」有指Kathy飛起男友，她說：「唔係！其實（錫面）只係禮貌上打招呼，唔通握手咩？好普通啫。」
Kathy表示感情事不想多講多交代，但指和高以翔只是朋友關係，她說：「我同佢係好正常嘅朋友，當日仲有好多工作人員喺度。我哋係朋友，只係工作上合作過。」問到Kathy與高以翔搭膊又錫嘴，她說：「角度問題，佢真係好高，我咪隨意咁搭一搭佢膊頭。」

冇介紹工作

談到外傳Kathy為冧高以翔，主動介紹工作給對方，她說：「以佢嘅條件同樣貌，真係唔使，佢好叻，又有拍電視劇，唔使我去push囉。」言談間，Kathy難掩對男方的好感，並大讚對方說：「佢好nice、好好、好高，合作上好少有咁高嘅partner，要着好高嘅高跟鞋先襯到佢！」
採訪、攝影：歐陽慧恩