英國《BBC》節目主持人、前英格蘭代表隊前鋒連尼加上季曾經打賭，如果李斯特城贏英超冠軍，新球季第一集嘅《Match of the Day》會著底褲出鏡，佢亦都係一名真漢子，開季第一輯節目就找咗數。之但係如果你以為佢已經玩夠？答案係未㗎！

衛冕嘅李城禮拜日喺主場以1:2輸俾西布朗之後，連尼加又試發功，希望放棄自己嘅尊嚴嚟曲線救一救自己支持嘅球隊。佢喺Twitter話，如果李斯特城今季衛冕嘅話，佢唔單止會喺下一季嘅第一集《Match of the Day》全裸出鏡，仲會倒立，另外兩位主持舒利亞同埋伊恩胡禮更加會同時拎枝棍打佢。兩位主持人係咪真係會配合，暫時仲係未知數，不過連尼加似乎好有信心，李城一定唔會衛冕。因為佢相隔一個鐘之後，就發咗另一條推文，話李城可能係史上第一隊贏歐聯，同時喺聯賽降班嘅球隊喎。