金像獎導演林嶺東今日在家中猝逝，終年63歲，震驚娛樂圈！

林嶺東執導的電影曾捧紅很多藝人，周潤發都是憑《龍虎風雲》奪影帝，林嶺東更在夜店中發掘肥媽Maria Cordero唱主題曲《要爭取快樂》，令肥媽一舉成名，其後肥媽亦為林嶺東另一部電影《監獄風雲》唱主題曲《友誼之光》，成為她的經典金曲。對於林嶺東忽然離世，肥媽接受《蘋果》電話訪問時十分震驚，不相信對方的死訊，頻說：「冇可能！」

肥媽不相信噩耗，在電話中重複說冇理由：「冇可能！喺邊度死？佢發生乜嘢事？冇理由㗎，我上次見佢都好健康，都有年幾兩年前，冇理由㗎！以前成日見佢係喺沙巴，因為佢喺沙巴有間屋種菜，我喺沙巴都有間屋，成日去度假見到佢，呢幾年佢返嚟拍戲少見咗。冇理由㗎，佢身體好健康，佢個人都好健康㗎，佢食唔食煙我唔知，但佢喺沙巴種菜，好鬼健康㗎。佢仲細過我，冇乜理由喎！真係可惜！」

提到當年林嶺東帶肥媽入行，她感恩說：「係佢呀，唔係佢我同泰迪羅賓唔會有今日，我好感激佢，佢搵我唱《龍虎風雲》主題曲，佢仲搵葉漢良同我出唱片，當年如果唔係佢叫我唱晒啲主題曲，我真係唔會有今日，所以我見親佢都：恩人！恩人！」

肥媽談到兩人的淵緣：「因為《要爭取快樂》呢隻歌，泰迪羅賓叫林嶺東搵我，話得我可以唱啫，我唱完之後，林嶺東再搵我唱《友誼之光》，佢話發哥、大儍個個都唱晒，你同我諗辦法唱到好突出，咁我咪用自己style唱到好突出，所以真係...好可惜！」