有著數，有抵食，有平霸就有我阿仁出現！朋友Ling姐推介︰「阿仁，大埔墟有10蚊下午茶喎，你有冇興趣？」可以食平啲，即使要坐45分鐘火車（老人家改唔到口叫港鐵囉），都忍不住第二日立刻帶SY齊齊去試平霸下午茶。

其實，當日是星期六，我出發前先致電確認周末也有$10下午茶供應才入大埔的，走入茶餐廳後，SY問我︰「爸爸！餐牌都無寫有$10下午茶嘅？」店員姐姐聽到便答︰「枱面有張卡牌仔就係囉。」我︰「有冇限每日只可以叫幾多份呀？」店員姐姐︰「梗係無啦，你鍾意8款全部叫幾份都得，絶對無問題！」

於是我先點了一碟咖喱炒飯，份量明顯是平常茶餐廳午市/晚市的四份之一，SY一邊食一邊說︰「少少少辣啱我食，仲有火腿同好多肉粒，係就係細份咗啲。」我︰「$10嚟講一啲都唔伏，起碼炒飯真係有料，今時今日喺香港地，$10仲食到飯真係去邊度搵吖？」

之後是小朋友指定要的煉奶牛油多士，以及奶油脆豬，我︰「阿囝，其實你叫兩樣嘢都係幾乎一樣喎。」SY︰「我鍾意食甜品呀，佢就係得依兩樣係甜嘅，所以我要嗌晒佢哋！」絶對是即叫即做，所以兩款甜點上枱時也是暖笠笠的。我︰「多士其實係一塊厚麵包，切開4份畀你咋喎。」SY︰「好食就得啦，不過……奶油脆豬好似好食啲，因為佢多啲煉奶，多啲牛油，而且仲脆卜卜，大大份又有兩件添，抵食過多士囉！」

最後，我點了個人認為$10之中最抵之選火腿鮑絲銀針粉，$10有鮑絲、火腿絲還有兩條菜心，而且放湯的銀針粉不是間間茶餐廳吃得到，雖然味道偏淡，份量也不算多，不過我覺得誠意可嘉，有時食得清淡一點也不錯啦。

註︰留意$10下午茶不包飲品，凍飲另加$9、熱飲另加$6。

廣東人小廚
地址︰大埔廣福道106號培錦樓地下4號舖
電話︰2686 1778
$10下午茶供應時間︰2pm-5pm（每日售完即止）

專欄作者簡介：
大仁生活愛玩具，愛一家三口吃喝玩樂，不停四圍影影影，愛電視、愛日劇、愛八，鍾意左儲右儲，鍾意咲看仁生。

Facebook專頁：
https://www.facebook.com/hayakutang

發掘更多身邊的小城故事，請LIKE 蘋地Facebook Page，並設定為「搶先看」： https://fb.com/appledailyland