區議會選舉仲有半年就舉行，本身被視為「紅區」嘅灣仔，又有新戰況。由於軒尼詩區議員、獨立泛民鄭其建料退下火線，議席引來各方勢力虎視眈眈，先有印度裔嘅民主思路成員白俊達表明有意落區服務，近日前亞視公關及宣傳科高級經理黃守東亦喺該區插旗，民主派方面，工黨成員夏希諾據聞亦將落戶該區，三個新人混戰，大戰一觸即發。

鄭其建其實喺2004年起已經當選軒尼詩區議員，為灣仔區少數親泛民議員之一。鄭今日回覆八方時證實，無意喺年底區議會選舉競逐連任，但未有透露原因，佢話留意到有「亞視暖男」之稱黃守東已經喺該區進行地區服務，惟不便評論，「我有見過佢（擺街站），不過我唔識佢就唔講咁多喇」。被問到黃守東係咪建制派？鄭稱「你睇佢同邊個合作就知，街坊都明，唔使我講」，佢亦冇明言會否推薦民主派喺該區出選。

有地區消息就話，黃守東近日喺灣仔區落腳，主打「暖男」旗號，不時同區內建制派進行聯合活動，懷疑佢係「假獨立，真建制」。黃守東接受八方查詢時就指，目前正在進行地區服務，同區內居民交流溝通；至於係咪參選，仍在考慮中。佢話自己喺朋友游說下開始地區服務，認為人生已經進入新階段，希望挑戰自己。被問到政治立場同取向，佢拒絕回應，僅稱：「我而家只係做社區服務，我認為暫時毋須定位自己。」觀乎黃守東宣傳品以藍色為主，唔知有冇乜啟示？

至於泛民主派亦有出戰人選，曾經喺2015年區選參選荃灣區議會嘅工黨夏希諾，有意以個人名義過區出戰。工黨消息話，夏希諾已經申請凍結黨籍並獲批，相信佢會以個人名義出戰區議會，消息強調夏並冇違反任何黨紀，亦信賴佢支持民主嘅立場不變。

【民陣6.9反惡法遊行】

日期：6月9日（日）
集合地點：維園草地
時間：下午2時30分集合，3時正起步
遊行路線：維園草地遊行至金鐘添美道立法會
（資料來源：民陣）

---------------------------
【六四30】守住歷史 拒絕遺忘
https://hk.adai.ly/zdzKtt2RiW