拍拖多年嘅雨僑同羅力威,雖然已經公開咗戀情,但每逢拍拖都好鬼避忌,幾日前本報記者見到佢哋孖實喺大坑食麵,都要戴住頂帽頭耷耷咁行。(新聞連結: http://bit.ly/24NBZNS )
行街驚俾記者影,之但係前日羅力威帶住女友返母校民生書院嘅開放日,終於可以放鬆啲,可以拖下手仔喇。噚日讀者吳小姐透過本報嘅爆相爆片,影到佢哋拍拖更、重遊羅力威母校嘅openday。吳小姐話:「我見到佢哋有拖手、繑手,冇乜避忌,冇化妝嘅雨僑冇乜人認得,但見到有好多人搵羅力威影相,好受歡迎!」
雨僑呢個女友真係唔話得,不時拎相機幫男友同fans影相,必要時佢仲自動彈開。羅力威,你真係要好好錫番女朋友呀!