Kevin Boy李健宏（KB）、Super Girls成員吳嘉熙（Cheronna）主持ViuTV節目《玩X爆泰國》，搵嚟泰國華僑小張做導遊，噚晚節目播出最後一集，安排喺九龍城一間泰國菜館搞聚會。泰國導遊小張經常喺節目被KB玩，成為取笑對象，不過小張好玩得，因而爆紅，KB早排喺網上招募小張fans，一齊嚟到現場睇最後一集節目。

現場大約有30幾位小張fans，當小張出現時，fans大嗌小張個名，而節目播出時，KB同小張就坐喺fans身邊一齊睇節目，Cheronna起哄叫fans大嗌：「I Love小張。」小張開心到攬住Cheronna，唔知係咪興奮過頭，小張個頭伏咗喺Cheronna胸口前，搞到Cheronna呆住笑，但亦不忘為對方解釋：「小張好興奮，雖然我都呆一呆，如果下次再係咁，我都會控制下佢，其實都唔介意，知佢冇心。」Cheronna仲大讚小張好正、好可愛、好Sweet，不過反應成日慢半拍。

至於呢位突然爆紅嘅泰國導遊小張，本身係泰國華僑，多年前喺酒店打工，之後轉做導遊，問佢知唔知自己紅咗？小張開心笑話：「我知道，有時帶團，啲團友都笑我。有次喺泰國曼谷行超市，突然有個人同我打招呼，我以為佢跟過我團，但原來對方只係喺電視見到同我，就想同我影相，而呢啲都係節目播出之後經常發生嘅事，亦都特別多咗香港遊客搵我帶團。」

講到成日俾KB玩，小張仲係好開心咁話：「係呀！佢成日玩我，有嬲過佢，有集講佢搵降頭師，我唔想去，因為我相信一定有，我唔敢入，非常之驚，嬲佢逼我入去，我嬲咗佢一個鐘，雖然係咁，但KB對我都幾好嘅。」KB突然間小張：「你有冇興趣做主持，幕前明星？」小張即刻話：「有呀！有呀！我有興趣做明星、做導遊，兩樣都想做，好威水。」

而KB就話今次搵到小張，係經一位港人朋友介紹：「第一日已覺得唔對路，佢反應好慢，但佢係節目中非常重要嘅人，捧紅咗佢o添！真係捉蟲入patpat。」

KB仲話會盡地主之誼招呼21號同家人到港嘅小張：「我去機場接佢時好失望，佢以為我會整蠱佢，當時我手上揸住樽水，小張即刻搶咗我樽水飲晒，佢驚我淋佢。」另外，繼《玩X爆泰國》後，KB話會再計劃去日本拍節目，小張聽到即刻興奮話：「好呀，去日本，去玩澳洲、歐洲。」

精選娛聞，喺晒《娛果》
http://fb.com/appledailyent