星夢娛樂一姐鍾嘉欣（Linda）自從年前俾吳若希（Jinny）扒頭，吳若希仲獲星夢娛樂CEO何哲圖（Herman）寵愛，令嘉欣BB慘被冷落。「典解嘅」吳若希當時憑住洗腦歌《越難越愛》，唱到拎埋《勁歌金曲總選》金曲金獎，上位快過坐直昇機，相反嘉欣BB呢兩年冇出新碟，商場演出活動仲少之又少。

今日有周刊報道爆，自從吳若希被爆忽然富貴，由初入行時家住屋邨搬入何文田豪宅，唔止孭名牌手袋、出入以名車代步，富貴過一班大台姐仔，但佢騷價，頂盡兩萬五。

吳若希雖然自稱舊年賺咗過百萬元，不過同幾位uncle傳過緋聞，關係似乎糾纏不清，令佢形象受損而失寵，盛傳吳若希被公司投閒置散，而嘉欣BB就再次被重用。

據知情者向周刊透露，早喺吳若希第一次傳出負面新聞嗰陣，有朋友叫佢低調啲，唔好揸保時捷，吳若希揸咗一排，結果俾Herman發現車主係中年男子，覺得唔妥即刻「雪藏」Jinny。

嘉欣BB「復活」後，最近工作量多咗，除咗主唱電視劇《無雙譜》插曲同《東坡家事》主題曲(如果你有聽過，應該會尬有同一個反應係:「唔係啩？」)，又忙住籌備新碟，而嘉欣BB上埋大台節目，坐正喺老闆Herman隔籬，就知嘉欣BB地位有幾高喇!嘉欣BB仲笑言自己係久休復出，覺到公司忽然將資源放番喺佢度，老闆Herman仲話唔一定係嘉欣BB有份演嘅劇集，先畀歌嘉欣BB唱，其他劇集都想俾埋嘉欣BB唱，咁講法，即係嘉欣目前再次得寵!

周刊都問過Herman係唔係Jinny形象受傳聞影響，Herman講唔關事，只係Linda拍完劇有空檔，首《一顆不變的心》受歡迎，先趕喺出年出碟，而Jinny首《我們都受傷》都會落力宣傳。