韓國人氣男團EXO噚晚喺亞博館舉行演唱會，係是次巡演香港場嘅首場演出，8子勁歌熱舞《Call Me Baby》、《Lotto》、《Sing For You》等熱門歌曲，又多次行到台前近距離見粉絲，並不時以普通話講「謝謝」感謝粉絲，冧足粉絲兩個半小時。

EXO一度將舞台打造成酒吧，8子不時派心、飛吻冧粉絲，各自更準備咗Solo舞台，當中Kai大晒芭蕾舞功架、D.O.就喺燦烈鋼琴伴奏下獻唱英文版嘅《For Life》，而燦烈Rap時有一句「疲憊時緊緊抓住那八雙手」嘅歌詞，意指EXO成員9位一體，粉絲立即尖叫。

連唱11首歌EXO先以普通話「大家好，我們是EXO」向粉絲打招呼，相隔1年4個月再來港開騷，8子均表示「好久不見」，普通話最叻嘅世勛亦稱「你們幸福嗎？今晚我希望你們一起玩」。隨後隊長Suho以韓文表示：「今次係繼《MAMA音樂頒獎禮》後再來港，呢個地方對我哋好有意義，希望大家可以享受今晚。」

之後EXO換上全白西裝化身白馬王子演唱多首歌曲，又行到台嘅兩側冧粉絲。Suho提到各成員嘅近況，表示：「眾人各有各忙，已經係隔1個月再合體開騷，所以唔止見到港迷覺得開心，可以見成員都感到興奮。」Suho又笑言因分開活動而感到寂寞，燦烈即表示自己有傳短訊為對方打氣。提到Chen、伯賢、Xiumin嘅小分隊CBX早前喺日本開騷，燦烈及世勛亦特地飛到日本撐隊友，燦烈大讚隊友有型，令佢好感動。

D.O.近日亦趕拍新劇中，表示會用心拍攝，希望粉絲多多支持，而D.O.發言期間，伯賢就搞鬼突然大讚對方可愛，令台下粉絲跟住講，場面爆笑。不過隨後Suho叫D.O.介紹下一首歌時，D.O.就忘記歌名，要燦烈提水。連唱多首快歌炒熱氣氛後，EXO就離開舞台，粉絲大合唱《For Life》等候安哥舞台，8子換衫後再現身唱《Don't Go》。

完場前，EXO表示是晚港騷好幸福，係好珍貴嘅回憶，而翌日仍有尾場演出，到時會繼續努力演出，同時又預告會出新碟及承諾再襲港開騷，叫粉絲要注意健康，世勛亦以普通話表示：「今天很多很多人來演唱會，真的謝謝，EXO一定報答你們。」EXO最後以《Angel》一曲作結，粉絲立即趁機會拋禮物上台送畀成員，伯賢執起玩具玩，燦烈就戴上綿羊帽，好不可愛，8子亦不停揮手向粉絲道別。

更多韓流，喺晒《娛果》
http://fb.com/appledailyent