張敬軒噚晚到尖沙嘴出席Yahoo頒獎禮，見佢個樣有啲病病哋，軒仔話自己係花粉過敏，仲笑言採花採得太多，因為年近聖誕要佈置屋企喎。軒仔啱啱喺大陸做完音樂真人騷，佢話見到90後參賽者好清純，純粹係鍾意音樂，諗番以前嘅自己：「雖然佢哋年紀係細，但自己企喺佢哋側邊，個樣都唔係差好遠，但有時面對小鮮肉，對於自己呢啲小臘肉都有一定壓力。」

問到佢點樣保鮮？軒仔話：「嚟緊會做高電壓電擊療程，用高電壓令到皮下細胞再生，係一個無創美容療程，都有少少贊助，自己唔使畀好貴，不過我一向甚少做facial，因為自己都崇尚自然。」問到驚唔驚上癮？佢話：「唔驚，都唔係打針，呢個做完一次，可能效用會好耐。」仲笑言要扮靚啲個樣，因為相士話佢2017年有桃花，問到驚唔驚係爛桃花？軒仔話：「通常好同壞嘅嘢都一齊嚟，不過自己好叻揀桃花。」

此外，軒仔日前喺社交網撰文撐陳柏宇（Jason），將叱咤我最喜愛男歌手一票投畀Jason：「因為我呢輩嘅歌手好好彩，Eason、克勤、基仔、安仔都淡出，等我哋有機會可以攞獎，我覺得應該將呢樣分享畀其他嘅人，Jason可能遲我兩三屆，加上樂壇好多人奮鬥好耐，但可能仲未有遇到機會，希望將呢個肯定一路傳出去。自己都係樂迷，如果有好作品聽到，自己都係得益者，樂壇唔係大家所睇惡性競爭，o依家大家話樂壇不景氣，更加要齊心。」