倫敦大雪、冰封機場之後，又到紐約及美國東北部飽受風雪摧殘，紐約市聯合國總部關門一天，機場停擺，起碼千五班航機取消。好彩冇乜留美嘅香港學生要返嚟過新年啫，否則又有不知所謂嘅聲音出現，要求政府包機去紐約！一位年紀輕嘅親戚就在呢一兩日飛去多倫多，到加拿大做大學交換生，又竟然要飛往歐洲轉機去加拿大，因為買唔到直航機票喎，唉吔，唔知會唔會碰上類似天氣與飛機阻滯呢，特登同佢爸爸講一聲：「請你叫公子有心理準備，隨時瞓機場，唔好打電話返嚟喊！」
呢日碰到旅遊界人士M，問佢生意如何，佢話：「今年環境大好，不只小好，香港人出外旅遊興趣濃厚，內地人，外國人來港，人數創新高，我地直情做唔切，只可惜臨到年尾，搞單歐洲大風雪，吹走咗一批歐洲長途客，令年尾生意額受少少影響。兼且現時係農曆年出外旅遊嘅訂團日子，呢幾日所見，訂位去得稍為慢咗，大概要睇清楚惡劣天氣是否會持續落去啩！」
旅遊業如此好景，點解傳出導遊罷工新聞呢？唔少人批評話本港旅行團嘅導遊冇基本薪水，一切靠貼士與購物回佣，令導遊生活無保障，家旅遊業推出「一團一導遊」政策，旅行社與導遊簽約，每月薪酬有二萬（拉平均計），照計唔錯吖，何以一啲導遊強烈反對，聲言要在旺季搞罷工？

旅遊M話導遊吃回佣，已是慣例，熟練高手每月進賬六七萬元，從中分番一啲俾幫Guide及「花女」（助手），前者負責接團，後者負責送團，高手就主打購物，日日密食購物團回佣，迎送團員呢啲粗重嘢就由助手去做，故此反對一團一導遊之議。如此議實施，高手要做埋接送呢啲冇回佣之事，起碼冇咗日半兩日，嘩，少咗好多帶團購物嘅時間噃。我地普通人去外地旅遊，旅遊車上見一位導遊，見足三至五日，冇話在購物之日，先至見到主導遊出現嘅唧。呢啲情況係香港自有自由行之後嘅偉大發明，來港之日本團、美國團等外國人旅行團，從來都係一團一導遊嘅，不過內地購物團特別好搵，先至出現一團三四個導遊嘅現象。