美國聯儲局今晚又再議息，市場估會加1/4厘，香港銀行相信會跟加。雖然美息前後加咗15次，香港人都感到麻木，但香港置業就搶閘做咗個民意調查，講吓市民對加息睇法。
港置喺兩日內成功訪問咗225個準買家，53%話冇影響入市意欲，比個多月前同類訪問嘅46%，上升7個百分點；話有影響嘅就少咗3個百分點，得番39%（見圖）。
另外，喺今個月加息後，68%受訪者預期到年底美國都唔會再加；25%話會加多1至2次；13%就相信會加3次或以上。
港置行政總裁胡日發亦相信今個月香港跟美國加息後，暫停加息可能性好高，而調查結果就反映加息對準買家嘅影響已經愈嚟愈細，即係市民對樓市前景好樂觀。

加埋唔夠劈價多

佢話𠵱家買家對樓價嘅敏感度，比利息仲高，加唔加息已經較次要。呢點蘭西都好認同，好似最近發展商劈價賣樓，一劈就係十幾二十個%，要減幾多厘息至夠？否則新地嘅荃灣爵悅庭貨尾，又點會喺劈價後嗱嗱聲就賣晒；而之前發展商提供幾多樓按優惠，都搞唔起個市。
呢類調查都係想話畀大家知，就算真係加息都唔使怕，總之繼續入市啦。
電郵地址：[email protected]