現在韓流喺亞洲仍然好勁，所以唔少時尚雜誌都愛搵韓星影相做封面，好似最近兩本時裝雜誌都邀請咗兩位年輕女星做封面人物，當中曾經有「國民妹妹」稱號嘅IU就為CeCiKorea創刊21周年紀念號影封面照，現年22歲嘅IU早前仲飛咗嚟香港影相，佢仲走到街上拍照，只見IU戴上黑色耳仔頭箍站喺街頭影相，背景仲見到香港嘅的士行駛。

而IU亦有喺類似酒店嘅房間影相，佢仲好大方大騷佢條玉腿，好鬼誘人。

至於另一女星、有「國民初戀」之稱嘅20歲嘅秀智就成為咗《ELLE》10月號嘅封面人物，佢仲成為雜誌最年輕嘅封面女星，而雜誌亦喺官方Instagram上載咗秀智拍攝時嘅花絮視頻，秀智心情大好，睇到攝錄機時即揮手晒V打招呼，雜誌仲留言：「將秀智包裝成羅馬女神嘅人究竟係何方神聖呢？請一定喺《ELLE》10月刊確認！」