日本搖滾組合ONEOKROCK（OOR）今日來港，準備聽日喺亞博舉行第二次香港騷。由Taka、Ryota、Toru及Tomoya組成嘅OOR，主音Taka係著名歌手森進一與森昌子嘅兒子，佢原本出身自尊尼事務所，屬偶像組合NEWS成員，後來退出尊尼，轉走搖滾路線。今日OOR接受本報訪問時，負責人率先表示唔好問及Taka前公司同SMAP嘅問題，而多年來Taka亦避免提及尊尼偶像，相信係想同前公司同偶像時期劃清界線。

其實Taka加入OOR後，事業相當不俗，佢哋兩次來港門票都極速被掃清，但Taka表示：「我都好驚訝得到香港粉絲支持，但自己都唔知乜原因，我哋最近先至喺海外推出CD，或者香港有不少人喜愛日本文化，而音樂又能夠連繫我哋。」佢又謂今次心情與上次一樣緊張：「因為好少見到香港粉絲，所以心情同上次一樣緊張，一定要做到最好。」OOR近年更去美國發展，Taka多次強調OOR組成嘅目標係希望打入國際市場：「希望到更多地方演出，喺美國嘅大型場地表演。」似乎志不在日本。

問到經常四圍開騷，有乜keep住體力方法，例如喺飲食及健身方面，Taka話佢哋經常記住自己嘅目標，咁就有動力。至於飲食方面，佢就話去到外地唔會食生嘢，因為佢試過食生蠔而中招肚痛。