日本影后中山美穗去年與丈夫辻仁成結束12年婚姻，同時爆出搭上音樂人澀谷慶一郎，美穗為姦夫放棄11歲大兒子辻十斗，健康形象冇晒。外表女性化嘅辻仁同美穗鬧離婚後，隨即改以好爸爸形象示人，既獨力撫養兒子，又成為料理達人。

身在法國嘅辻仁成，前日起喺twitter以洗版式大晒父子情，除咗上載為兒子煮嘅愛心午餐外，又喺24小時內發咗近20條短訊，大部份均有提到辻十斗，又話兒子趁復活節假期去咗朋友仔家玩尋找復活蛋遊戲。佢話乖仔融入咗對方嘅幸福家庭，令仔仔好開心。佢又暗示自己身兼母職辛苦：「阿仔唔喺度嘅星期日，開始覺得幾開心。」寸爆美穗為姦夫棄子。

雖然辻仁成早已同美穗斷絕來往，但原來美穗仍有喺twitter追隨辻仁成，相信係見到前夫句句有骨嘅留言，美穗今朝隨即反擊，先寫：「點解個啲男人可以咁乸？呢番話係用嚟形容啲男人，相反地我係個選擇沉默嘅女人。」之後又稱：「對於乸型有幾衰，我寧願靜靜地閉上雙眼，唔想人哋嘅是非黑白沾染喺我身上。」