【本報訊】近70名反對高鐵市民及受高鐵工程影響的新界村民，昨往高鐵站對面的西鐵柯士甸站示威。
開放日開始後，約10名「旺角鳩嗚團」成員在柯士甸站D出口示威，該出口為前往西九龍站參觀市民必經之路。鳩嗚團在出口外舉起印有「地今日還是香港，明日被收歸國有」的橫額，並高喊「一條高鐵、兩制消失、三步亂走」等口號，又向排隊等候參觀的市民大喊：「大家可能好開心咁嚟睇開放日，但呢條高鐵係用咗我哋好多錢，同埋亦都有好多甩轆。」

水源枯竭　屋現裂痕

鳩嗚團示威過後，另一批元朗攸潭美村及圍仔村村民前往柯士甸站，抗議高鐵工程嚴重影響他們的居住環境。近60名村民在D出口地面大堂遊行，沿路拉起印有「高鐵破壞住屋，村民有口難言」等橫額，其間與前往參觀市民發生口角，有參觀者不滿村民示威，指罵「阻住晒」，並以粗口辱罵。
圍仔村居民代表尹錦棠指，高鐵試車時為村裏帶來震盪，導致房屋出現裂痕，噪音問題亦持續困擾村民，「我哋希望港鐵同我哋去解決呢個問題，對我哋嘅困擾真係好嚴重」。攸潭美村村民吳達源指，過往高鐵工程導致村內地下水源枯竭，「因為高鐵喺度開發而影響到我哋嘅水源，到𠵱家好多個井都無水或者唔夠水，我哋嘅要求從來都係想佢恢復返個水，但都做唔到」。
■記者李雨夢